Kings of Penalty 2019

Déi 11. Editioun vum Kings of Penalty huet de 7. an 8. Juni 2019 zu Berbuerg am Stade Renert statt fonnt. Trotz dem onbestännege Wieder iwwer déi zwee Deeg, war den Oflaf einwandfräi an d'Stëmmung wéi emmer feucht-fröhlich.

Freides war eisen mëttlerweil schon traditionnellen Concertsowend. Déi kaal Loft an zäitweise Reen hunn der gudder Laun vun eise Museker an eise Gäscht awer keen Ofbroch gedoen. Den Optakt huet d'Bech-Berbuerger Musek zesummen mam Thierry Mersch, Dan Thurmes an Tom Eiffes am Zelt gemaach, deels e "re-live" vun hierem erfollegräiche Galaconcert Ufanks Mee am Beaurepaire. Duerno den Optrëtt op der Bühn vum Thierry Mersch, woubäi säin Hit "Inferno", deen a ganz speziellen Konstellatiounen viirgedroen ginn ass, wuel sou munchem nach eng Zäitchen am Ouer hänke bleift. Fir den Ofschloss hunn eis finnesch Kollegen vun Stage Addicts mat hierer eenzegarteger Manéier vun akousteschem Pop-Rock nach eng Kéier gutt agheizt.

Samsdes war dann de groussen Eelefmetertournoi mat knapp 80 Equippen. Verschiddener waren derbäi fir e relaxen Daag mat Kolleegen ze verbréngen, aanerer waren ugetrueden fir sech den Titel an domat ee vun de schéine Präisser ze huelen. Gespillt ginn ass dëst Joer an engem vereinfachte Modus wou als éischt 12 Gruppen à 7 Equippen ugetruede sinn, an et duerno direkt am K.O.-Modus mat den 1/32-Finallen weidergaangen ass. Um Enn waren et d'Jongen vun der zweeter Equipe vum FC Jeunesse Biwer déi ganz uewen op der Treppchen stoungen. Gratulatioun hinnen all a jidderengem en décke Merci fir d'Matmaachen. Héi sinn déi 4 Gewënner 2019:

1. Plaz: BiwerDiZweet gewënnt 6 Terra Pads vun eisem laangjärege Partner, der Firma Eye-T vu Manternach
2. Plaz: Fullemetti gewënnt e bon de réduction vun 175 Euro pro Spiller beim Kaf vun neie Pneuen beim Pneus Center Frisange
3. Plaz: SL Colinho gewënnt e Saz personnaliséiert Trikot'en vun GEFF Sport Luxembourg
4. Plaz: Legends, déi de Gewënner vun de leschten zwee Joer FC Potaschbierg an der 1/16-Finall erausgeheit hunn, gewannen 2x6 Béier.

Niewt der gudder Laun, villen Eelefmeter, kaalem Béier a beschte Beats vum DJ Freezy, haate mer awer och nach zwou ganz flott Aktiounen niewt dem Terrain:

Aus dem Freiburger Emland a vu Basel kënnt säit e puer Joer e Grupp Kolleegen extra de wäide Wee bis op Berbuerg op de Penalty. Zesumme sinn sie Fans vum SC Freiburg an och mat hierem Fanclub "Grenzgänger Nord" um Tournoi vertrueden. Dëst Joer hu mer duerch en Austausch vu Fanschaler eng Art Fanfreundschaft zwëscht hierem Fanclub an dem FC Berdenia Berbourg geschloss. Super Jungs, Danke fürs Kommen, ist immer wieder ein Spass. Wir freuen uns schon auf die nächsten Pistoleros mit euch ;-)

Last, but not least, war no der Präissiwwerreechnug eng ganz spontan Aktioun vum Tom Picard, deen als Clown verkleed op säin Happy Man Project opmierksam gemaach huet. Hien sammelt duerch verschidden Challenges Suen fir de Gudden Zweck. Sou sinn um Enn nach bal 600 Euro fir d'Ile aux Clowns um Penalty zesumme kommen. Grousse Respekt a weider sou. Eis Ënnerstëtzung hues du!

Als Ofschloss hu mer de Penalty 2019 bei der Musek vun de Stage Addicts an dem DJ Humpenzähler gemittlech ausklénge gelooss!

Kings of Penalty 2020

Gléck am Ongléck kéint ee soen. Dëse Weekend hätt sollen déi 12. Editioun vum Kings of Penalty sinn, ugefaange um Freideg mam Concertsowend a mam Eelefmetertournoi e Samsdeg de ganzen Dag. Mee leider ass am Joer 2020 jo alles aanescht.

No wochelaanger Préparatioun an 3 Deeg Site opriichten wiere mir gëschter um Freideg géint 18h00 prett gewiescht fir eis Gäscht ze empfänken an e flotten Owend mat live Musek ze feieren. Pünktlech fir de Optakt wieren awer och d’Onwiederen um Rendez-Vous gewiescht mat Knëppelsténg a vill Loft a Reen, sou dass daat Ganzt mat grousser Wahrscheinlechkeet an d’Waasser gefall wier.


D’Wieder um Samsdeg huet sech besser annoncéiert, awer ëmmer mat der Ongewëssheet dass rëm e Stuerm an Donnerwieder opzéiht a deemno mam Risiko den Tournoi rëm mussen ofzebriechen sou wéi 2018 op eiser 10-järeger Jubiläumseditioun. Keng schéi Viirstellung. Am Normalfall wier et awer no enger Reih Béieren a Flieten e flotten Daag mat Kolleegen gewiescht wou géint der Owend déi beschten (oder déi glécklechsten) Equipe den Tournoi an déi 6 Terra-Pads vun der Firma Eye-T gewonnen hätt.

Deemno war et vläicht Gléck am Ongléck dass mir dëst Joer zu enger Paus gezwonge gi sinn. Daat nächst Joer kënnt de Kings of Penalty awer zréck - sträicht iech elo schonn den 11. + 12. Juni 2021 am Kalenner un!

Niewt den Duerfleit, all den Equippen an de ville fräiwëllege Veräinsmemberen, wëlle mir awer virun allem och eise laangjährege Sponsoren op dëser Plaz villmools Merci soen. Ouni si wier dësen Tournoi an de leschte Joren sou net méiglech gewiescht. Dofir ënnerstëtzt och eis Sponsoren, grad an dësen Zäiten.

Als Ersatz fir de Penalty 2020 organiséiert de Veräin de 4. Juli e Flieten Drive-In zu Berbuerg um Terrain. Maacht är Commande elo op info@berdenia.lu!

Bis dohinn – bleift gesond

äre Penalty Organisatiouns Comité